ഏകദിന ക്രികറ്റ് ടീമില്‍ ലോകത്തിലേക്കും മികച്ച റാങ്കിങ്ങുമായി നില്‍ക്കുന്ന ബംഗ്ലാദേശിനോട് മരിച്ചു പൊരുതി "ശതകത്തില്‍ ശതകം" എന്ന അപൂര്‍വ്വ ലോക റെക്കോര്‍ഡിന് ഉടമയായ ശ്രീമാന്‍ ലിറ്റില്‍ മാസ്റ്റര്‍ പ്ലാസ്റ്റര്‍ സച്ചിന്‍ ടെന്‍ഡുല്‍ക്കറിനു വീരാളി പട്ടും തങ്ക പതക്കവും നല്‍കി ആദരിക്കുവാന്‍ തീരുമാനിച്ചിരിക്കുന്നു.
കൂടാതെ ഈ ഒരു സുവര്‍ണ്ണ നിമിഷത്തിനായി കഴിഞ്ഞ 370 ദിവസങ്ങള്‍ ആയി കണ്ണില്‍ എണ്ണയും ഒഴിച്ച് കാത്തിരുന്ന എല്ലാ ആരാധകര്‍ക്കും, ഒലക്കേടെ മൂടും വെച്ച് തലമണ്ടക്ക്‌ ഓരോ തട്ട് കൊടുക്കാനും ഈ കൂട്ടത്തില്‍ തീരുമാനിച്ചിട്ടുണ്ട്. ആയതു സ്വീകരിക്കുവാന്‍, ആരാധകരെന്നു തെളിയിക്കുന്നതിലേക്കായി "സമ്മാനം" സ്പോണ്‍സര്‍ ചെയ്തിരിക്കുന്ന "കുണ്ടാമണ്ടി" ഗ്രൂപ്പ് നടത്തുന്ന ചെറിയ ചെറിയ "സംഗതികളിലും" പ്രാവീണ്യം തെളിയിക്കേണ്ടതാണ്. പങ്കെടുക്കുന്നവര്‍ക്ക് വീരാളി പട്ടും തങ്കപതക്കവും ധരിച്ചു സുസ്മേരവദനനായി മന്ദസ്മിതം തൂകി നില്‍ക്കുന്ന മാസ്റ്റര്‍ പ്ലാസ്റ്ററിന്‍റെ ഓരോ ഫോട്ടോയും ഫ്രീയായി നല്‍കുന്നതാണ്.
(ഏകദിന ടെസ്റ്റിനു വരുന്നവര്‍ പ്രാവീണ്യം തെളിയിക്കേണ്ടതായ ഒന്ന് രണ്ടു ടെസ്റ്റുകള്‍ മാത്രം ഇവിടെ നല്‍കുന്നു)
1. "സച്ചിനെ നമഹ:,സച്ചിനെ സ്തുതി " എന്ന് തൊണ്ട പൊട്ടുമാറുച്ചത്തില്‍ മുഴങ്ങുന്ന ശബ്ധത്തില്‍ പത്തു തവണ അലറിവിളിക്കാന്‍ ഉള്ള കഴിവ്.
2. പത്ത് മിനിറ്റ് സമയത്തിനുള്ളില്‍ "സച്ചിനെ നമഹ:,സച്ചിനെ സ്തുതി "എന്ന വാചകം അക്ഷരതെറ്റോ, കുത്തും കോമയുമോ നഷ്ട്ടപെടാതെ ഏറ്റവും കൂടുതല്‍ പ്രാവശ്യം എഴുതുക.
NB:-മത്സരത്തിനു വരുന്നവര്‍ സ്വന്തം പേന, അവനവന്‍റെ തൊണ്ട തുടങ്ങിയവ മാത്രം ഉപയോഗിക്കുക. അല്ലാത്തവരെ നിര്‍ദാക്ഷിണ്യം പുറത്താക്കുന്നതാണ്.
മുന്നറിയിപ്പ്: തൊണ്ട പൊട്ടി കുരവള്ളി പുറത്ത് ചാടിയാല്‍ പരിപാടിയുടെ സംഘാടകരോട് യാതൊരുവിധ നഷ്ട്ടപരിഹാരവും ചോദിക്കില്ല എന്നൊരു സമ്മതപത്രവും "നോട്ടറി" മുഖേന ഹാജരാക്കേണ്ടതാണ്.
യാതൊരു മുന്നറിയിപ്പും കൂടാതെ സംഘാടകര്‍ക്ക് പരിപാടിയില്‍ മാറ്റം വരുത്താവുന്നതാണ്.
No comments:
Post a Comment